زايد ابن عدله وعلي مساعد

زايد ابن عدله
من بلاد اهل الوفاء والجود والميقافي=ياسلام بردةً يم السماء معناها
ياعلي خابرك في وقت اللزوم سنافي=هجمت الفرسان بالميدان ماترضاها

علي مساعد
من بحور الشعر ماهو من هبوب السافي= مرحبا ترحيبةً فوق القمر مسراها
يابن عدله مامشيت مع المسيره حافي=ولا سبحت الا البحور اللي غزيرً ماها

زايد ابن عدله
ياعلي ماكل كفً بالمواقف وافي=والرجال العاقله معروفةً بأرياها
وانت تال الوقت مثل معمر القذافي=ساعةً تنطح وهجها وساعةً تبراها

علي مساعد
انت زايد مانت ناقص والسنين عجافي=شيّبت بعض الوجيه اللي كرام اللحاها
وانت لاتجدد علينا قصة الصحافي=ذيب في سرد السوالف مير مايحماها

زايد ابن عدله
وانت من روس الرجال اللي كرمها كافي= من تعشى من صحنها راح مايشناها
ليه تلبس بشت يقصر عنك ماهو ضافي=راعي الداله عن الشعله يبي يرفاها

علي مساعد
ياكريم الوجه لو نقطع حليب الصافي=ماتت اطفال العرب بأسباب نقص اغذاها
مالبست البشت لكني وصلت اهدافي=صرت الاول بالصفوف ولا التفت لاقصاها

زايد ابن عدله
ياكريم الوجه ماكل العيوب تشافي=فيه علّه يبلش اكبار الاطباء ادواها
مادمر سوق المعاني غير يوسف شافي= مير علّم سالم معزي يعيد ابناها

علي مساعد
ياوسيع الجمجمه ياضيّق الكتافي=منك عيّت تسلم الفرسان في مغزاها
كان الك قدره تولّع ياسراج الطافي=ابعث اصحابك من الظلمه ولاتنساها

زايد ابن عدله
ياعلي عزّز مقامك عن كلامً هافي=لاتميح أدليّ قومً قضبتك ارشاها
ان خبطنا الداب مات وسال سمّه دافي=ماخذينا سيوف عاريّه ولابعناها

صح لسان الشاعرين
وشكرا على النقل

صح لسااان كل الشاعرين وهم شعار مميز ولهم جمهور وشكرآ لك اخوي على النقل..